Jahresbericht Saison 2014/15 – NS Volley, von Karin Peita

Liebe Leute, Saison 14/15, im Blick zurück,

nochmals vor Augen geführt hier, Stück für Stück.

Jahresberichte vorgelesen in Sätzen so in braven,

lassen viele nach fünf Zeilen bereits friedlich schlafen.

Deshalb heute, ihr könnt schon mal träumen,

bekommt ihr alle in Mundart und erst noch in Reimen!

Mannschaftsufstellig wird diskutiert,

denn strategisch alles ustariert,

6er hinnä gspielt und hart i-trainiert,

s’Mitteloch so praktisch zue betonniert.

Nei Gegner händ jetzt nünt meh z’lache,

NS Volley macht schliesslich kei halbi Sache!

Endlich wieder äs offiziells Turnier,

bim BTV – so richtig gigrig sind mir.

Noch dem Training und dene Strategiä,

sind üs, au ohni Red Bull, Flügel verliehä.

Für üs isch’s Ziel hoch und glasklar,

dä erschti Platz passt drum, wunderbar!

En Rieseädank a Sandra a dere Stell,

digital lauft Ziit so unghür schnell,

di coolschti Webside het NS Volley jetzt,

au do isch en Spitzeplatz scho bsetzt.

Und denn no äs Highlight bi Conny und Co.

Merall hett es Schwöschterli übercho!

Bi Super-Wetter im Pfaffenasäwald,

trifft me sich mit Chind und Chegel bald.

D’Areis mit em Velo sportlich wild,

oder halt mit em Auto, eher mild.

Es Grillfäscht mit Leckereiä uf heissem Isä,

endet mit Masseschlofe – nei, mit Päusli uf dä Wiesä!

Volleyball-Weekend in Reiden stot a,

taktisch und konditionell chunsch grausam dra.

Verfineret wird Mannschaftsufstellig, nöd schlecht,

d’Agriffsmaschinerie lauft fascht uswendig, echt.

S’Mittagesse sowit guet, git im Mage aber Chlumpe,

wenn’t noch Schnipo sötsch am Netz no drü Stund gumpe!

Administrativs git’s au no z’brichte,

Plessürli lönd üseri Reihe liechte.

Mannschaft verstärkt drum Debi und Domenica,

diä beidä hett üsri IV-Truppe nötig ka.

D’Anita isch cho und gad wieder gange, mit Gfühle,

mit denä si sich bi üs nöd hett chöne wohl fühle.

Zäme schlemme, gmüetlich und gar nöd tür,

chasch ebe nu bi dä Ulli i dä Schür.

Fondue-Fasnachtsesse het Tradition,

viellicht nöd s’Nr. 1 für Fitness und Kondition,

aber, wenn alli Sache mitbringed und höckled isch klar,

das isch für dä Teamgeischt eifach wunderbar!

Zum Sport: Thema Wintermeisterschafte,

wenn Spannig stiegt, s’Nervekostüm liecht tuet belaschte,

volle Körperisatz, hart umkämpfti Spiel i jedre Phasä,

nüt wird gschenkt, trotz Yvonn‘s brochner Nasä.

Em Mario tüemer immer viel Nerve choschte,

am Schluss chömmer üs aber für Platz 2 zueproschte!

S’Winter-Weekend, i müest susch würkli lüge,

isch mega lässig und cool gsi, döt obe in Splüge.

Im Nebel hend dä Mario und Karin Pischtä gsuecht,

Domenica und d‘ Raphy sind glaufä wiä verfluecht,

aber würkli nüt wachst ufä bis i di hoche Bäum,

höchschtens Elch-Pischi vo dä Karin und dä Raphy für gueti Träum!

Relaxe am Obig i dä heissä Sauna und im Hallä-Bad,

do bisch doch fürs Nachtprogramm wieder voll parad.

Es feins 4-Gang-Menü lot d’Herzä höcher schlo,

mit em Buffet zum z’Morge cha dä zweit Tag gern cho.

Mit dä Sunnä sieht mä am Sunntig au Pischte emol,

Het mega Spass gmacht mit eu, freu mi scho ufs nöchschti mol!